Il-Biċċerija Pubblika bħala l-uniku fornitur ta’ servizzi relatati mal-qatla għal annimali bovini, ħnieżer, ekwini u ruminanti żgħar f’Malta, tgħin lill-istituzzjonijiet tal-edukazzjoni lokali biex jiksbu kwalunkwe parti tal-karkassa jew tal-interjuri li jistgħu jeħtieġu sabiex iwettqu kif suppost il-funzjoni(jiet) didattiċi jew ta’ riċerka tagħhom. Tali istituzzjonijiet ġeneralment jeħtieġu partijiet tal-karkassa għall-użu mill-istudenti f’korsijiet tal-bijoloġija u l-anatomija u f’assoċjazzjoni mal-istudji mediċi u tal-arti.
Filwaqt li lesta tgħin tali istituzzjonijiet billi tipprovdi l-partijiet neċessarji tal-karkassa jew tal-interjuri, il-Biċċerija Pubblika tipprova tiżgura li tali partijiet jintużaw skont ir-regolamenti rilevanti nazzjonali u tal-UE. Fost oħrajn, il-partijiet tal-karkassa jew l-interjuri kkunsidrati bħala Prodotti Sekondarji mill-Annimali ta’ Kategorija A ma jistgħux jingħataw lil kwalunkwe tali istituzzjoni sakemm il-bini/faċilitajiet tagħhom (kif ukoll il-vetturi tat-trasport użati biex iġorru tali materjal mill-Biċċerija lejn il-faċilitajiet approvati) ma jiksbux l-approvazzjonijiet neċessarji mid-Direttorat tar-Regolamentazzjoni Veterinarja skont ir-regolamenti tal-UE. Bħala eżempju, l-għajnejn tal-Annimali Bovini ta’ annimali li għandhom aktar minn 12-il xahar huma kkunsidrati Materjal ta’ Riskju Speċifiku u għaldaqstant ma jistgħux jingħataw lil istituzzjonijiet tal-edukazzjoni (jew istituzzjonijiet oħra) sakemm mhux awtorizzati taħt ir-Regolament tal-Kummissjoni (UE) Nru 142/2011.
Il-partijiet tal-karkassa jew l-interjuri għandhom ikunu ttrasportati f’kontenituri adegwati skont ir-Regolament (KE) Nru 853/2004 tal-Parlament Ewropew u tal-Kunsill tad-29 ta’ April 2004 li jistabbilixi ċerti regoli speċifiċi ta’ iġjene għall-ikel li joriġina mill-annimali.
Barra dan, tali istituzzjonijiet huma meħtieġa jarmu kwalunkwe parti tal-karkassa jew l-interjuri miksuba mill-Biċċerija Pubblika skont il-leġiżlazzjoni applikabbli, u dawn jistgħu jeħtieġu l-inċinerazzjoni fil-faċilità approvata tat-trattament termali tal-iskart.
Istituzzjonijiet tal-edukazzjoni jew istituzzjonijiet oħra li jeħtieġu partijiet tal-karkassa jew l-interjuri huma mistiedna jniżżlu l-formola rilevanti mil-link li ġejja u/jew jikkuntattjaw lill-Amministrazzjoni tal-Biċċerija Pubblika.