Il-Biċċerija Pubblika tipprovdi servizzi relatati mal-qatla għal annimali bovini, ħnieżer, ekwini u ruminanti żgħar. Tali servizzi jinvolvu għadd ta’ proċessi, primarjament: il-qatla ta’ ħames speċijiet tal-annimali (bhejjem, ħnieżer, nagħaġ, mogħoż u żwiemel); servizz ta’ tqattigħ u spolpjar ta’ karkassi f’sala separata; it-twassil ta’ karkassi lil ħwienet tal-laħam jew proċessuri tal-laħam; u r-rimi jew l-irkupru ta’ prodotti sekondarji mill-annimali. Hija l-akbar stabbiliment tal-laħam aħmar f’Malta (il-biċċerija t’Għawdex hija l-uniku stabbiliment ieħor bħal dan fil-gżejjer, għalkemm ferm iżgħar) u għaldaqstant hija element essenzjali fl-industrija tal-laħam lokali billi l-bhejjem, il-ħnieżer, in-nagħaġ, il-mogħoż u ż-żwiemel kollha li jitrabbew u jinqatlu f’Malta jinqatlu f’din il-faċilità.

L-annimali li jinġiebu fil-biċċerija jiddaħħlu għall-qatla f’waħda miż-żewġ kennijiet tal-annimali fejn jiġu spezzjonati għal problemi bit-trattament xieraq tal-annimali u l-iġjene. Barra minn dan, Veterinarju jwettaq spezzjoni ta’ qabel il-qatla biex jevalwa l-adattabbiltà tal-annimal għall-qatla u l-konsum eventwali mill-bniedem. L-annimali jinqatlu f’waħda miż-żewġ linji tal-qatla fil-biċċerija. Il-qatla titwettaq b’mod uman skont l-istandards internazzjonali tat-trattament xieraq tal-annimali. Wara l-qatla, il-karkassi jgħaddu grad ta’ pproċessar bħat-tisliħ u t-tneħħija tal-intestini. Barra dan, jittieħdu kampjuni minn kull karkassa għal ittestjar addizzjonali fil-Laboratorju Veterinarju Nazzjonali. Fl-aħħar nett, il-veterinarji jwettqu spezzjoni wara l-qatla, fuq kull ras biex jikkonfermaw l-adattabbiltà tiegħu għall-konsum mill-bniedem. Il-karkassi huma wkoll ikklassifikati biex tkun aċċertata l-kwalità tal-laħam tagħhom. Il-karkassi mbagħad jinħażnu fi kmamar b’temperaturi kkontrollati fit-tħejjija għall-konsenja u/jew it-tqattigħ u l-ispolpjar.