Il-mekkaniżmu tal-UE għall-klassifikazzjoni tal-karkassi tan-nagħaġ jistabbilixxi kriterji komuni għall-klassifikazzjoni tal-kwalità tal-laħam mal-Unjoni Ewropea kollha, u għaldaqstant jiżgura standards ta’ klassifikazzjoni komuni mal-Istati Membri kollha. Il-klassifikazzjoni tan-nagħaġ mhix obbligatorja u minħabba l-volumi żgħar tal-qtil ta’ annimali ovini f’Malta, l-annimali ovini mhux qed jiġu kklassifikati.

Standard ta’ klassifikazzjoni komuni jiżgura li l-konsumaturi mal-UE kollha jkunu jistgħu jqabblu l-kwalità tal-laħam prodott/ipproċessat fi kwalunkwe Stat Membru ieħor tal-UE u għaldaqstant jixtru l-kwalità tal-laħam li jiggostaw l-aktar filwaqt li jevitaw deskrizzjonijiet tal-kwalità suġġettivi li jistgħu jvarjaw minn reġjun għal ieħor. Barra minn dan, tkun tista’ tintuża wkoll is-sistema tar-rapportar tal-prezz mal-UE kollha, u t-tqabbil ta’ prezzijiet tal-laħam ta’ kwalità simili mal-UE kollha.

Il-klassifikazzjoni għall-annimali ovini titwettaq fuq tliet livelli hekk kif ġej:

Kategorija: L-annimali ovini kollha huma kklassifikat taħt waħda minn żewġ kategoriji differenti skont l-età tagħhom: L għall-karkassi tan-nagħaġ ta’ taħt it-12-il xahar u S għall-karkassi tan-nagħaġ l-oħra kollha.

Konformazzjoni (SUEROP): din tindika l-forma tal-karkassa u tqis l-għolja tal-koxxa, id-dahar u l-ispalla tal-karkassa u hija indikata bl-ittri S (Superjuri), E (Eċċellenti), U (Tajba Ħafna), R (Tajba), O (Mhux ħażina, P (Inferjuri).
Grass (Klassi tal-Grass 1-5): din tindika l-ammont ta’ grass fuq in-naħa ta’ barra tal-karkassa u fil-kavità toraċika. Dan huwa indikat bin-numri 1 (Baxx), 2 (Kemxejn), 3 (Medju), 4 (Għoli), 5 (Għoli Ħafna).